明年是《變形金剛》25周年大日子，史匹堡搵佢拍續集，玩具迷同佢慶祝，連廠商都乘機推出25年前元祖柯柏文助興，「文哥」除了跟足初代設計和上色，更首次附送當年第一期《變形金剛》復刻漫畫，莫講話大部分Fans未見過，就算eBay搵到廿年前的《變形金剛》漫畫都喪炒至三百美元，折算後二千幾港紙，本書仔隨時值租過機械人，一邊揭一邊玩都咪話唔過癮。
按發聲器有真人說出經典語句如「I am Optimus Prime」，如果識講中文就好了。
貨櫃背部設有機關掣，一按偵察車仔就會彈出，都彈得幾遠。
初代套裝 有聲有畫
1984年《變形金剛》由斯比頓星衝落地球，掀起一股變形機械人熱潮，由《特種變形勇士》、《頭領戰士》到電影版，歷代機械人款式係咁變，但最受玩家歡迎始終是84年初代柯柏文。因此25周年系列便以G1柯柏文作頭炮，無論造型設計、變身過程和貨櫃形態都忠於原著，雖然八十年代玩具都預咗靈活性較弱，但玩上手感覺尚算實淨，手腳關節可作90度屈曲，仲送埋真人發聲器和復刻漫畫，絕對有聲有畫。
貨櫃基地 炮彈飛車
粉絲不難發現近年電影版和動畫版柯柏文，背後都唔見咗個貨櫃，其實初代柯柏文的貨櫃才是設計精髓，能隨時變形成指揮部收納機械人，內裏有齊可活動的醫療架和獨立偵察車仔，最好玩是一按貨櫃背部的機關，偵察車仔便可像炮彈飛車般彈出，重演當年電視卡通的經典場面，滿足一班玩具迷的要求。
歷代柯柏文演變
80年代
G1即是第一代變形金剛的意思，當中出過多個版本。
90年代
柯柏文在《Beast War》版（《特種變形勇士》）裏變成大猩猩，突破傳統。
2007年
電影真人版賣個滿堂紅，柯柏文除變成拉花車身，更加入閃燈和發聲設計。
2008年
近期播放的Animated動畫版《變形金剛》，柯柏文變得修長，充滿美式風格。
五合一博狂再現
其實柯柏文只是25周年系列頭炮，另有大量復刻玩具將會登場，當中較矚目的是Universe亞洲區別注版合體變形金剛，沿用初代五合一機械人「飛天派」和「戰鬥派」，分別由5隻獨立機械人合體而成。兩者手腳部分可Crossover交換合體，擺出不同姿態。
別注版大兜亂
玩Crossover的不止合體戰士，另一批25周年Universe亞洲別注版變形金剛，更經過重新繪圖設計，當中備有柯柏文、麥加登、拖帶和鋼鎖4款。麥加登唔做手槍化身裝甲坦克，而博派的恐龍機械人鋼鎖則反串印上狂派嘜頭，柯柏文背部更隱藏按鈕可作360度旋轉。這些版本只在亞洲地區發售，老外都可能要來港先買得齊。
